Fitacciyar marubuciyar nan Malama Sa\u2019adatu Baba Ahmad ta wallafa sabon littafi na wa\u0199o\u0199in Hausa mai suna \u2018Muryoyin Zuci.\u2019 Littafin, mai shafi 80, ya na \u0257auke da rubutattun wa\u0199o\u0199i har guda 30. An kasa su zuwa gida uku, inda kashi na 1 ya ke \u0257auke da wa\u0199o\u0199i shida, shi ma kashi na 2 wa\u0199o\u0199i shida, sai kashi na 3 mai wa\u0199o\u0199i 18.<\/p>\n\n\n\n
Wa\u0257annan wa\u0199o\u0199i, kamar yadda za mu kawo maku nazari a kan su nan gaba ka\u0257an, sun ginu ne bisa jigogi daban-daban na rayuwar mu ta yau. Amma sun fi karkata ne ga fa\u0257akarwa kan rayuwar duniya da bu\u0199atar yin tanaji don rayuwar gobe \u0199iyama. Akwai wasu da aka yi su kan wasu mutane da marubuciyar ta sani ko ta ji labarin su, kamar marigayi Sarkin Kano Muhammadu Sanusi, da \u0199awar ta, Talatu (Carmen McCain), da wata Halima, da Farfesa Attahiru Jega, da wasu \u2019yan unguwar su marubuciyar, wato Fagge, wa\u0257anda su ka riga mu gidan gaskiya, da dai sauran su. Shi ma gidan Rediyon Freedom na Kano ba a bar shi a baya ba, an wa\u0199e shi.<\/p>\n\n\n\n
Masana biyu sun yi gabatarwar littafin. Na farkon su shi ne Dakta Yusuf M. Adamu, sai kuma Farfesa Abdul\u0199adir \u018aangambo, dukkan su malamai a Jami\u2019ar Bayero, Kano. A gabatarwar sa, Dakta Yusuf ya fa\u0257a wa mai karatu abin da kowane kashi na littafin ya \u0199unsa. Ya yi nuni da cewa kashi na 1 ya \u0199unshi wa\u0199o\u0199i ne da su ka shafi Musulunci da garga\u0257i da kuma ta\u2019aziyya da abokantaka. Wa\u0199o\u0199in kashi na biyu sun maida hankali ne a kan matsalolin Nijeriya kamar na za\u0253e. Kashi na 3 kuma ya \u0199unshi wa\u0199o\u0199i ne da su ka shafi soyayya da mutuwa da rubutu da hassada.<\/p>\n\n\n\n
Dukkan masu gabatarwar, wato Yusuf da \u018aangambo, sun yi la\u2019akari da hikimar marubuciyar da irin basirar ta, musamman wajen amfani da kalmomi da kuma salon wa\u0199o\u0199i masu \u0199war \u0257aya, wanda ba a cika samu ba a fagen rubutun Hausa a yau.<\/p>\n\n\n\n
A littafin, har wa yau, wasu masanan guda uku \u2013 wato Malam Isma\u2019il Garba, Malam Zul\u0199ifil Adam Garba Dakata da Malam Bala Muhammad \u2013 su ma sun yi sharhi, inda su ka yaba da wannan gagarumin aikin.<\/p>\n\n\n\n
Ita dai Sa\u2019adatu Baba Ahmad, wadda mata ce ga Alhaji Shehu Sunusi Bayero, sananniyar marubuciya ce. Ta rubuta littattafan Hausa sama da 20. An haife ta a Kano a ranar 27 ga Yuli, 1984. Ta yi karatun addini da na boko duk a Kano, inda a yanzu haka \u0257aliba ce a Sashen Koyar da Harsunan Nijeriya a Jami\u2019ar Bayero. Memba ce kuma a \u0198ungiyar Marubuta ta Nijeriya (ANA), reshen Jihar Kano.<\/p>\n\n\n\n
\u2014<\/p>\n\n\n\n
An buga a LEADERSHIP HAUSA ta ranar Juma\u2019ar makon jiya<\/em><\/p>\n